平凡行入非凡的道路
金娘（1747-1787），出世佇公元1747年（清乾隆12年）的大木連社（上淡水社，今屏東縣萬丹鄉、內埔鄉），伊是馬卡道原住民，是一位獨生女。大漢的時，爸母替伊招一个唐山來的翁婿──洪標。結婚後，金娘佮爸母、翁婿過一般人的生活。無疑悟，1779年（清乾隆44年），大木連社發生疫情，俗語講是「著災」，爸母佮翁婿攏致病來過身。
佇無倚無靠之下，金娘懇求族內尪姨（女巫）賓娜的幫贊。佇賓娜陪伴照顧之下，金娘身體真緊恢復建康。紲落就拜賓娜為師，學習醫術佮巫術救世。
佮賓娜學巫術佮醫術的 時陣，金娘閣熟似一位精通道術、方術的唐山客—林乞。林乞發覺金娘是一位會當牽教的後輩，就送伊一本請神治病的經冊，落尾就替人請神、畫符仔佮治病的服務。因此，伊佇屏東平原一帶有相當的聲望，甚至鳳山縣漢人聚落，嘛慕名而來。
公元1780年（清乾隆45年），一位來自福建省仙遊縣的林紅，因爸母攏過身，來臺灣揣生路。捌聽過金娘的名聲，拜金娘收伊為徒，便若開壇作法的時，林紅攏擔任擂鼓)。兩人因為長期做伙，1786年（清乾隆51年），金娘佮林紅就鬥陣做伙生活。