轉變ê機緣：加入抗清陣營
公元1787年（清乾隆52年）正月，林爽文事件的南路大元帥莊大田，因為後生莊天位(畏)破病，就由金娘去請神畫符醫治。後生佮一寡反清人士ê病治好，莊大田大元帥進一步，邀請金娘為反清陣營佇打狗港（今高雄港）祭神保庇in出陣祈福，莊大田大元帥佩服金娘的才調，封伊為軍師。
公元1787年（清乾隆52年）三月初，莊大田的後生莊天位想欲攻打鳳山縣城，請示軍師金娘。隨後，金娘即時佈陣，步罡踏斗，手攑寶劍，喙裡唸唸有詞，紲落畫符請神，鼓舞莊天位佮天地會成員的士氣。
當金娘作法後，天地會軍隊誠順利地佔領鳳山城，會眾攏認為是金娘的功勞，推崇伊是「仙姑」。金娘協助攻破鳳山的消息，真緊傳到天地會盟主大元帥林爽文的耳內，林爽文認為金娘功勞不小，就佇4月20封伊做「一品柱國夫人」，連結天地會佮金娘之間的關係。其中原因是因為擔任軍師的金娘手下直接統領的士兵總共有一萬外人。
紲落，莊大田所領導的軍隊攻打臺灣府城，莊大田命將領莊錫舍、許尚分別攻打府城大南門、小北門佮大北門。金娘跟隨莊大田做伙攻打大東門佮小東門。無疑悟，莊錫舍與莊大田之間煞起衝突，閣加上莊錫舍的小弟──莊達德私下一直向兄哥苦勸投降。閩浙總督常青接受莊錫舍投降，莊錫舍自願「立功贖罪」，佮過去天地會同志正式對決。
公元1787年（清乾隆52年）5月，常青領軍攻佔莊大田根據地──南潭庄（今臺南市歸仁區），過程中，莊錫舍拐騙金娘，共扣押起來，獻予閩浙總督常青。
公元1787年（清乾隆52年）仝年8月，林爽文事件告一段落，金娘、林紅等一行人佮天地會盟主──林爽文被押解到北京審問，落尾佇眾人面前凌遲處死，結束伊悲壯的一生。
結論：以女性佮平埔族等弱勢身分出頭的金娘，佇清朝臺灣是一件不可思議的奇蹟。有人認為身為女性的金娘，有法度佇漢人為主的林爽文勢力徛懸位，是因為林爽文勢力集團欲結合斯當時猶是母系社會為主的平埔族群。
林爽文事件的領導者林爽文無應該簡單當做叛賊抑是英雄，伊根本是遵照彼个時代的方式拚命活落去爾，落尾行向被處死的結局。用叛賊抑是英雄來將林爽文的形象二元化，檢采攏無法度反應伊真實的性格。