各位聽眾，你敢有聽過啥物交通工具的聲音？今仔日「佇厝講台語」的主題是「交通工具的聲音」。嘉芬校長佮淑惠老師邀請臺北市建安國小六年仔的賴品元小朋友，做伙來開講，分享伊聽過的各種交通工具的聲音，除了救護車佮拍火車，閣有警察車和飛行機。伊印象上深的是佇機場聽過飛行機起飛的聲音，彼當時準備欲出國旅遊，感覺足歡喜。
而且伊捌聽老師講過伊細漢讀冊的時陣，較早的學校佇咧鐵路邊，學生囡仔定定佇上課的時會聽著火車的聲音。淑惠老師嘛分享家己的經驗，伊講上驚行佇人行道的時聽著跤踏車的鈴仔聲。
節目的尾聲嘛有鼓勵聽眾「佇厝講台語」，透過遮趣味的分享，嘉芬校長和淑惠老師𤆬領聽眾認捌各種交通工具的聲音，閣提醒逐家和厝內的人分享愛注意交通安全。
