各位聽眾朋友，你敢有佇網路買物件的經驗？你敢捌佇網路頂懸看著，買落來的物件，和原來的廣告無同款的？
今仔日「佇厝講台語」的主題是「網路買真方便」。嘉芬校長佮淑惠老師邀請著臺北市建安國小六年仔的林予翔小朋友做伙來開講。伊有講著學校的電腦課，有教in按怎使用網路較安全，「用網路代替馬路，予你學啥物有法度」。
雖然網路買賣真方便，毋過若看著連結網址，千萬毋通烏白揤，若無，就有可能會予歹人共你的個人資料偷提去。若準接著詐騙電話的時莫驚惶，愛遵守以下的原則：1聽(恬恬聽)2.掛(掛電話)3.查(敲165查證)。
節目的尾聲嘛有鼓勵聽眾「佇厝講台語」，佮厝內的人分享「網路買真方便」，閣有預防詐騙的方法，按呢毋若會當增加學台語的機會嘛會使增加和厝內的人的互動喔！
