各位聽眾，你敢知影交通安全愛注意啥物？今仔日「佇厝講台語」的主題是「交通安全愛注意啥物代誌」。
節目一開始，兩个主持人咧討論in是按怎來去學校的，淑惠老師講著騎跤踏車毋但會當運動閣會當顧健康。節目中閣邀請著臺北市建安國小六年仔的葉華臻小朋友做伙來分享「騎跤踏車的安全觀念」。
華臻除了分享家己騎跤踏車的經驗以外，閣講著伊佇學校學著的交通安全智識。譬論講：雖然無規定騎跤踏車愛戴安全帽，毋過安全帽保護咱的安全。閣有跤踏車愛盡量騎佇跤踏車道，上好嘛愛裝電火。
節目的尾聲嘛有鼓勵聽眾「佇厝講台語」，透過遮趣味的分享，嘉芬校長和淑惠老師𤆬領聽眾了解交通的安全智識，閣提醒逐家和厝內的人做伙注意。
